Il-Ministru għall-Enerġija, Miriam Dalli, qalet li l-ilma huwa fil-qalba tal-missjoni ta’ Malta għal reżiljenza kontra l-isfidi dejjem jiżdiedu tat-tibdil fil-klima. F’indirizz fil-COP29 f’Baku, il-Ministru Dalli qalet li peress li d-domanda fuq is-sistema tal-ilma qed tiżdied, Malta qed tkun pijuniera b’mod sostenibbli biex titjieb l-infrastruttura u s-servizzi tal-ilma. Hawnhekk, irreferiet għall-impjant ta’ reverse osmosi f’Għawdex u qalet li dan juża 23.5% inqas enerġija minn impjanti konvenzjonali. Il-Ministru Dalli qalet li dan hu rekord ġdid u prova tal-impenn ta’ Malta fil-qasam tal-klima.
Fil-COP29 saret referenza wkoll għat-titjib fl-effiċjenza tal-ilma, it-tnaqqis fit-telf tal-ilma u s-sistema li tirriċikla l-ilma permezz tan-New Water għall-agikoltura. Malta ppreżentat ukoll l-istrateġiji innovattivi għall-finanzjament, bħall-qafas ta’ green bonds ta’ €25 miljun, kif ukoll pjan biex il-pajjiż jesplora l-kunċett ta’ blue bonds għall-infrastruttura marittima. Issemmiet ukoll il-viżjoni tal-pajjiż għall-proġetti ta’ enerġija rinnovabbli offshore.
Stqarrija tal-Ministeru għall-Enerġija qalet li l-isforzi ta’ Malta ġew imfaħħra minn Gianni Chianetta, Fundatur u Chairman tal-Greening the Islands Foundation, li nnota l-avvanzi ta’ pajjiżna fit-tmexija tal-ilma u l-enerġija rinnovabbli. Irrefera fost oħrajn għall-impjant il-ġdid f’Għawdex li qal hu xhieda tad-direzzjoni pożittiva li qed tieħu Malta.
