Il-Climate Action Authority hija determinata li tagħti vuċi b’saħħitha lit-tfal fit-tfassil u l-implimentazzjoni tal-inizjattivi tagħha. Dan kien messaġġ evidenti meta t-Tnejn filgħodu iktar minn 130 student inġabru għall-Eco-Schools 13th Young People’s Summit, inizjattiva li saret b’kollaborazzjoni bejn l-awtorità u Nature Trust FEE Malta.
L-istudenti li pparteċipaw jattendu skejjel differenti madwar il-pajjiż u ngħataw spazju biex jgħidu tagħhom dwar il-futur b’emfasi fuq l-ambjent u l-azzjoni klimatika. Il-ħsieb tal-Climate Action Authority issa hu li t-tant ideat u punti importanti diskussi dwar is-suġġett tal-bidla fil-klima, ma jispiċċawx għax intemmet l-attività. Minflok diġa’ beda x-xogħol biex ikun ippubblikat ktieb li proprju titlaq mill-ideat tal-istess tfal waqt l-istess attività. Il-pubblikazzjoni mhux biss għandha l-iskop li sservi bħala għodda edukattiva, iżda sservi wkoll ta’ messaġġ ċar li meta wieħed ikun determinat jista’ jasal biex jibdel l-affarijiet għall-aħjar. Dan il-ktieb eventwalment se jitqassam fl-iskejjel. Ir-rakkomandazzjonijiet mressqa mill-istudenti ser ikunu wkoll diskussi f’mozzjoni fil-parlament waqt id-dsatax -il seduta tal-EkoSkola Parliament li Nature Trust FEE Malta torganiżża kull sena taħt il-patroċinju tal-ispeaker Dr Anġlu Farrugia.
Il-Ministru għall-Ambjent, l-Enerġija u l-Indafa Pubblika, Miriam Dalli u l-Ministru għall-Edukazzjoni l-Isport ir-Riċerka u l-Innovazzjoni Clifton Grima ukoll ingħaqdu mal-istudenti f’sensiela ta’ workshops biex jisimgħu direttament l-ideat tal-istudenti u l-proposti tal-istudenti.
Il-Ministru Miriam Dalli spjegat kif waħda mill-għanijiet tal-Climate Action Authority hija li tagħti spazju lill-ideat tat-tfal biex dawn l-ideat isiru parti mill-policies tal-pajjiż. “Nintela b’kuraġġ u ottimiżmu meta nara l-attiviżmu ta’ tant tfal li jagħżlu li jagħtu mill-ħin tagħhom, inkluż fl-iskola, biex jaħdmu favur ambjent aħjar,” qalet il-Ministru Dalli. Fissret il-bidliet li qed isiru f’diversi oqsma, inkluż is-settur tal-enerġija u dak ta’ proġetti ta’ spazji miftuħa, u filwaqt li qalet li dawn huma proġetti kbar u ambizzjużi hemm għażliet li nistgħu nagħmlu fil-ħajja ta’ kuljum li wkoll jistgħu jagħmlu d-differenza.
Il-Ministru Clifton Grima saħaq li, “Bħala pajjiż, għandna l-għarfien li t-tfal mhumiex biss il-futur tagħna, imma huma wkoll parti importanti mill-preżent li qed ngħixu. Smajna diversi studenti li ngħataw din l-opportunità permezz tal-EkoSkola sabiex jesprimu l-ħsibijiet tagħhom dwar l-ambjent, it-tibdil fil-klima, u dak li jixtiequ jaraw lil Malta twettaq biex ikunu jistgħu jgħixu f’soċjetà aħjar. Tajna din il-pjattaforma, li eventwalment se narawha fil-Parlament, fejn se nkunu qed niġbru l-ideat tat-tfal tagħna. Fuq kollox, se naħdmu biex dawn l-ideat jiġu implimentati.”
Inidirizzaw is-sessjoni wkoll, il-Kap Eżekuttiv tal-Climate Action Authority, Ing. Abigail Cutajar u s-sur Vincent Attard President ta’ Nature Trust FEE Malta.
Cutajar tenniet li l-istudenti, partikolarment dawk li jieħdu sehem fl-attivitajiet ta’ EkoSkola, huma meqjusa bħala msieħba importanti ħafna fix-xogħol li trid tagħmel l-Awtorità.
Vincent Attard ta’ Nature Trust FEE Malta qal “Il-programm EkoSkola kien sa mill-bidu intenzjonat biex jagħti vuċi lit-tfal. Ġie varat fi żmien fejn kien għad hemm l-idea li it-tfal għadhom żgħar wisq biex jifhmu il-konsegwenzi tal-għażliet li nagħmlu kuljum. Illum, iktar minn għoxrin sena’ wara nistgħu nghidu li dan l-iskop mhux talli intlaħaq iżda mar oltre’. It-tfal ta’ EkoSkola mhux biss huma mħassbin imma għandhom soluzzjonijiet prattiċi li qed iwettquhom fl-iskejjel u l-komunitajiet fejn jgħixu. Din tal-llum hija okkażżjoni oħra fejn grazzi għal CAA erġajna laqqajna t-tfal ta’ etajiet differenti biex ikomplu jgħidulna x’qed iħassibhom u x’azzjonjiet hemm bżonn nieħdu. Nature Trust FEE Malta tħoss li huwa obbligu morali li it-tfal u żagħżagħ jkunu parteċipi fid-diskussjoni ladarba huma se jkunu affetwati bid-deċiżjonijiet li ser jittieħdu.
Intant, matul l-istess attività l-istudent Luke DeBono kien rikonoxxut għall-kisba li għamel meta f’kompetizzjoni internazzjonali Children’s Eye on Earth kiseb it-tielet post.
